Electric Vs Non-Electric Vehicles: कोणती कार आहे बजेट फ्रेंडली?

Electric Vs Non-Electric Vehicles: इलेक्ट्रिक वाहनांचा मेन्टेनन्स आणि इंधनाची कार्यक्षमता यामुळे या प्रकारातील गाड्या सध्या लोकप्रिय आहेत. पण या गाड्या टिकाऊ आहेत की नाही, याबाबत संभ्रम आहे. कारण अनेक ठिकाणी इलेक्ट्रिक वाहनांच्या दुर्घटना घडत आहेत. कालांतराने त्या कमी होतील. पण तुम्हाला जर कार घ्यायची असेल तर तुम्ही कोणती कार घ्याल. याबाबत आपण दोन्ही कार्सची माहिती घेऊ. त्यातील फरक समजून घेऊ. मग तुम्ही तुमच्या पसंतीची कार नक्कीच घेऊ शकता.  

गाडी इलेक्ट्रिक असो किंवा नॉन-इलेक्ट्रिक (Non-Electric Car) ती घेण्यापूर्वी सर्वप्रथम आपल्या आर्थिक परिस्थितीचे मूल्यांकन करणे गरजेचे आहे. कार घेणे ही गरज आहे का? की तो आपल्या राहणीमानाचा किंवा स्टेट्सचा विषय आहे आणि त्यासाठी तुम्ही बजेट किती निश्चित केले आहे. हे सुद्धा तितकेच महत्त्वाचे आहे. कारण तुम्ही कर्ज काढून गाडी घेण्याचा विचार करत असाल तर, गाड्यांसाठी कर्जपुरवठा करणाऱ्या कंपन्या इलेक्ट्रिक (Electric Car) आणि नॉन-इलेक्ट्रिक कार्ससाठी वेगवेगळे व्याजदर आकारतात. त्यामुळे सर्वप्रथम वरील प्रश्नांची उत्तरे तयार ठेवा आणि पुढीलप्रमाणे गोष्टी तपासून त्याचा निर्णय घ्या.

गाडीची किंमत

इलेक्ट्रिक गाड्या या नॉन-इलेक्ट्रिक गाड्यांपेक्षा महाग असतात. पण त्यांचा इंधनाचा आणि मेन्टेनन्सचा खर्च तुलनेने खूपच कमी असतो. जो तुम्ही कर्ज घेणाऱ्या बॅंकेच्या रकमेवर परिणाम करणारा ठरू शकतो.

बॅंकांचे व्याजदर

इलेक्ट्रिक गाड्यांवरील कर्जाचे व्याजदर हे नॉन-इलेक्ट्रिक गाड्यांपेक्षा कमी असू शकतात. कारण सरकार स्वत:हून इलेक्ट्रिक गाड्यांना प्रमोट करत आहे. या गाड्यांमुळे इंधनाची मागणी कमी होऊ शकते. तसेच प्रदूषण आटोक्या येण्यासाठी याची मदत होऊ शकते. त्यामुळे सरकारसह बॅंकाही इलेक्ट्रिक कार्ससाठी कमी व्याजदर आकारू शकतात. पण तरीही कर्ज काढून गाडी खरेदी करताना वेगवेगळ्या बॅंकांचे व्याजदर लक्षात घेऊन त्यांची तुलना करून निर्णय घेणे गरजेचे आहे.

कर्जाच्या अटी

जेव्हा कर्ज काढून गाडी घेण्यासाठी अर्ज करता तेव्हा बॅंकेच्या सर्व अटी व नियम समजून घेणे गरजेचे आहे. तसेच कर्ज देणाऱ्या बॅंकेच्या प्रतिनिधीशी बोलून जास्त वर्षाचे कर्ज मिळवण्यास तुम्ही यशस्वी झाल्यास तुमचा मासिक हप्ता कमी होऊ शकतो. प्रत्येक बॅंकांचे याबाबतचे नियम वेगवेगळे असतात. त्यामुळे बॅंकेशी प्रत्यक्ष बोलून,त्यांना आपला प्रस्ताव देऊन योग्य तो निर्णय घ्यावा.

कर सवलत

तुम्ही कुठे राहता आणि तुम्ही विकत घेतलेल्या गाडीवर तुम्हाला किती कर सवलत मिळू शकते किंवा तुम्ही त्यासाठी पात्र आहात की नाही, हे ठरते. कारण गाड्यांवरील टॅक्स आकारणी हा विषय राज्य सरकारच्या अखत्यारित येतो. त्यामुळे काही राज्यांनी लोकांनी इलेक्ट्रिक वाहने खरेदी करावीत. यासाठी त्यावरील टॅक्समध्ये बेनिफिट्स दिले जात आहेत.

गाडीचा इन्शुरन्स

गाडीचा इन्शुरन्स ही सर्वांत महत्त्वाची गोष्ट आहे; मग ती गाडी इलेक्ट्रिक असो किंवा नॉन-इलेक्ट्रिक. इलेक्ट्रिक गाड्यांच्या किमती पाहता नॉन-इलेक्ट्रिक गाड्यांचा इन्शुरन्स हा तुलनेने कमी असू शकतो. त्यामुळे गाडी खरेदी करण्यापूर्वी किंवा गाडीची निवड करण्यापूर्वी इन्शुरन्सचे रेट्स सुद्धा तपासून घ्यावेत.