या वर्षी उन्हाळ्याचे आगमन लवकर होत आहे. तसेच या उन्हाळ्याच्या दीर्घ कालावधीच्या शक्यतेच्या पार्श्वभूमीवर एअर कंडिशनर (AC) निर्मात्यांना यावर्षी त्यांच्या विक्रीत 15-20 टक्के वाढ होण्याची अपेक्षा व्यक्त केली आहे. वाढत्या मागणीला अनुसरून, एसी (AC) उत्पादक आयओटी आणि एअर प्युरिफायरसारख्या स्मार्ट वैशिष्ट्यांसह उर्जा-कार्यक्षम, इन्व्हर्टर-चालित एसी घेऊन येत आहेत. एसी उत्पादकही मागणी पूर्ण करण्यासाठी त्यांचे उत्पादन वाढवत आहेत. याशिवाय रेफ्रिजरेटर आणि कूलर (Cooler) यांसारख्या इतर उत्पादनांच्या विक्रीतही उत्पादकांना वाढ अपेक्षित आहे.
कडक उन्हाळ्याची शक्यता
टाटा समूहाची कंपनी व्होल्टासने सांगितले की, या उन्हाळ्यात देशभरात तापमान असामान्यपणे वाढले असल्याने त्यांना मोठ्या प्रमाणात विक्रीची अपेक्षा आहे. व्होल्टासचे व्यवस्थापकीय संचालक (एमडी) आणि मुख्य कार्यकारी अधिकारी (सीईओ) प्रदीप बक्षी यांनी सांगितले की, एसी, कुलर आणि फ्रीज यांसारखी उत्पादने खरेदी करण्यासाठी किरकोळ विक्रेते आणि खरेदीदारांमध्ये मागणी वाढल्याचे आम्ही पाहिले आहे. कंझ्युमर इलेक्ट्रॉनिक्स अँड अप्लायन्सेस मॅन्युफॅक्चरर्स असोसिएशन (CEAMA) ला यावर्षी एसीच्या विक्रीत सुमारे 20 टक्के वाढ अपेक्षित आहे. CEAMA चे अध्यक्ष एरिक ब्रागांझा म्हणाले की, देशभरात तापमान वाढत असल्याने उन्हाळा सुरू झाल्याचे दिसत आहे. ते म्हणाले की, हवामानात कोणताही बदल झाला नाही किंवा कोणतीही अनुचित परिस्थिती निर्माण झाली नाही, तर एसीच्या विक्रीत 15 ते 20 टक्क्यांनी वाढ होण्याची शक्यता आहे.
एसी विक्रीत वाढीची अपेक्षा
2022 मध्ये भारतीय एसी बाजार सुमारे 82.5 लाख युनिट्स होता आणि दुहेरी अंकांमध्ये विक्रमी वाढ नोंदवली. जॉन्सन कंट्रोल्स-हिताची एअर कंडिशनिंग इंडिया, जे हिताची ब्रँड नावाने एसी विकते, त्यांनादेखील बाजारातील वाटा आणि घरगुती वापराच्या एसीच्या विक्रीत लक्षणीय वाढ अपेक्षित आहे. जॉन्सन कंट्रोल्स-हिताची एअर कंडिशनिंग इंडियाचे अध्यक्ष आणि व्यवस्थापकीय संचालक गुरमीत सिंग म्हणाले की, या वर्षासाठी आम्ही विक्रमी दुहेरी अंकी वाढीची अपेक्षा करत आहोत. ते म्हणाले की पहिल्या सहामाहीत विक्री वाढीचा दर सुमारे 25 टक्के अपेक्षित आहे, जो संपूर्ण एसी उद्योगाच्या वाढीपेक्षा जास्त असेल. त्याच वेळी ब्लू स्टारचे व्यवस्थापकीय संचालक बी त्यागराजन म्हणाले की, यावर्षी उन्हाळा लवकर येत आहे आणि 2023 मध्ये एकूण 20 टक्के वाढ अपेक्षित आहे, तर उन्हाळी हंगामात 25 टक्के वाढ अपेक्षित आहे. गोदरेज अप्लायन्सेसला 2023 मध्ये त्याच्या निवासी एसीपासून 1,200 कोटी रुपयांपर्यंत दुप्पट वाढ अपेक्षित आहे. "गेल्या वर्षी आणि या वर्षात एसी खरेदीला खूप चांगला प्रतिसाद आहे. आम्ही या वर्षी अधिक विवेकी खर्चाची अपेक्षा करू शकतो कारण कर सवलतींसह लोकांच्या हातात अधिक पैसे असतील," गोदरेज अप्लायन्सेसचे बिझनेस हेड आणि कार्यकारी उपाध्यक्ष कमल नंदी म्हणाले. गेल्या वर्षी, अधूनमधून पडणाऱ्या पावसामुळे मागणी कमी झाली आणि महागाईचा कलही कंपन्यांना सुधारित किमतीत वाढ करण्यास भाग पाडले, असेही ते म्हणाले.
