जर तुम्ही MIDC म्हणजेच Maharashtra Industrial Development Corporation मध्ये स्वतःचा उद्योग सुरु करण्याचा विचार करत असाल आणि त्याबद्दल तुम्हांला सविस्तर माहिती नसेल तर हा लेख तुम्ही वाचलाच पाहिजे.
व्यवसाय सुरू करण्यासाठी महाराष्ट्र औद्योगिक विकास महामंडळ (MIDC) मध्ये जमीन मिळवणे हे किचकट काम वाटत असले तरी दीर्घकालीन परिणाम बघता तुमचा निर्णय फायद्याचा ठरू शकतो. MIDC मध्ये उद्योग सुरु करण्यासाठी खालील गोष्टी तुम्ही लक्षात ठेवायला हव्यात.
एक गोष्ट लक्षात असू द्या, MIDC ही महाराष्ट्र सरकारची एक योजना आहे, ज्याद्वारे उद्योगांना चालना देण्यासाठी, रोजगार निर्मितीसाठी शासन काही जागा आरक्षित करते आणि त्या जागेवर उद्योगांना सर्व सोयीसुविधा मिळतील याची काळजी घेतली जाते. काही ठराविक कालावधीसाठी MIDC मध्ये लीजवर जागा दिली जाते. त्यासाठीचे शासनाने दरपत्रक देखील ठरवून दिले आहे.
Table of contents [Show]
जागेची पाहणी करा
महाराष्ट्रातील उपलब्ध असलेले MIDC झोन आधी जाणून घ्या. मुंबई, ठाणे, रायगड येथे अभियांत्रिकी,अन्न प्रक्रिया,ऑटो, रसायने, फार्मास्युटिकल या क्षेत्रातील उद्योगांसाठी अनुकूल अशा MIDC आहेत. तसेच पुणे, चाकण, तळेगाव, सातारा येथे डेटा सेंटर,रत्ने आणि दागिने,अभियांत्रिकी,अन्न प्रक्रिया,ऑटो या क्षेत्रासाठी MIDC सहकार्य करते.
उत्तर महाराष्ट्रात नाशिक, अहमदनगर, मालेगाव येथे अन्न प्रक्रिया,वैद्यकीय उपकरणे, अभियांत्रिकी विषयांतील उद्योगांना प्राधान्य दिले जाते. तर औरंगाबाद, जालना, नागपूर आणि अमरावती येथील MIDC एरोस्पेस आणि संरक्षण,अभियांत्रिकी, कापड, अन्न प्रक्रिया संबंधित उद्योगांना प्रोत्साहन देते.
तुम्ही ज्या क्षेत्रात उद्योग सुरु करायचा विचार करत असाल, त्या संबंधित मुलभूत सुविधा सदर MIDC झोनमध्ये उपलब्ध आहे किंवा नाही याची माहिती घ्या आणि औद्योगिक क्षेत्रांचे संशोधन करा जे तुमच्या व्यवसायाच्या गरजा पूर्ण करतात. नजीकच्या बाजारपेठ, वाहतूक पायाभूत सुविधा आणि युटिलिटीजची उपलब्धता यासारख्या घटकांचा विचार करा.
MIDC शी संपर्क साधा
एकदा की तुम्ही MIDC झोन फायनल केला की उपलब्ध जमिन, भाड्याचे दर आदी पर्यायांबद्दल माहिती घेण्यासाठी MIDC कार्यालयाशी संपर्क साधा. तुम्ही त्यांच्या वेबसाइटला https://www.midcindia.org/ भेट देऊ शकता किंवा मदतीसाठी त्यांच्या प्रादेशिक कार्यालयांशी संपर्क साधू शकता.
अर्ज सबमिट करा
MIDC मधील जमीन भाड्याने घेण्याबाबत तुमचे स्वारस्य व्यक्त करणारा अर्ज MIDC कार्यालयात जावून सबमिट करा. तसेच MIDC वेळोवेळी जमिनीच्या पार्सल (tenders for land parcels) निविदा प्रसिद्ध करत असते, त्यावर देखील लक्ष ठेवा.
उद्योगाचा प्रकार, गुंतवणूक, रोजगार निर्मिती आणि पर्यावरणीय नियमांचे पालन यासारख्या घटकांवर आधारित MIDC तुमच्या व्यवसायाच्या पात्रतेचे मूल्यांकन करू शकते. तुमचा अर्ज मंजूर झाल्यास, MIDC उपलब्धता आणि योग्यतेवर आधारित जमिनीचे वाटप तुम्हाला करेल. तुम्हाला अटी व शर्ती नमूद करणारे एक करारपत्र MIDC कडून दिले जाईल, ते व्यवस्थित वाचून घ्या आणि सही करून कार्यालयात जमा करा.
पेमेंट शेड्यूल, लीज कालावधी आणि कोणत्याही संबंधित पायाभूत सुविधा विकास खर्चांसह खरेदी किंवा भाड्याच्या अटींवर उद्योजक म्हणून तुम्ही वाटाघाटी करू शकता. जितक्या जास्त सुविधा पदरात पाडून घेता येतील तितक्या घेण्याचा प्रयत्न करा.
उद्योगासाठी मंजुरी मिळवा
MIDC मध्ये जागा मिळवली म्हणजे विषय संपला असे नाही. तुमच्या व्यवसायाच्या प्रकारानुसार आवश्यक असलेल्या पर्यावरणीय मंजुरी आणि बांधकाम परवानग्या यांसाठी संबंधित नियामक संस्थांकडून आवश्यक ती मंजुरी आणि परवानग्या मिळवा.
आवश्यक पायाभूत सुविधा उपलब्ध झाल्यानंतर, तुमचे व्यवसाय संचालन सुरू करा. तुमच्या व्यवसाय ऑपरेशन्सशी संबंधित कोणत्याही सहाय्य, अपडेट्स किंवा समस्यांसाठी MIDC अधिकाऱ्यांशी नियमित संवाद ठेवा.
महाराष्ट्रातील MIDC झोनमध्ये व्यवसाय सुरू केल्याने सुनियोजित औद्योगिक पायाभूत सुविधा आणि धोरणात्मक निर्णयांचा उद्योजकांना लाभ मिळतो. महाराष्ट्रात उद्योगधंद्यांना चालना मिळावी, नवनवे उद्योग राज्यात येऊन रोजगार निर्मिती व्हावी यासाठी राज्य सरकार वेगवेगळ्या स्वरूपाचे अनुदान देखील देत असते. त्यामुळे MIDC मध्ये जागा लीजवर घेऊन व्यवसाय सुरु करणे फायद्याचे ठरू शकते.
