मुंबई : एअरफ्लो रेल टेक्नॉलॉजीजचे शेअर्स बाजारात कमालीची उसळी घेत आहेत. लिस्टिंगनंतर अवघ्या सात दिवसांत या शेअर्सने तब्बल 155% परतावा दिला असून, गुरुवारी पुन्हा एकदा 5% अप्पर सर्किट गाठत बीएसईवर 52 आठवड्यांचा नवा उच्चांक नोंदवला. कंपनीचा आयपीओ नुकताच आला होता आणि त्यालाही गुंतवणूकदारांचा अफाट प्रतिसाद मिळाला होता.
आयपीओला विक्रमी प्रतिसाद
एअरफ्लो रेल टेक्नॉलॉजीचा आयपीओ 15 सप्टेंबरला संपला होता. या दरम्यान 65 लाख नवीन शेअर्स विक्रीसाठी ठेवले गेले. प्रति शेअर किंमत पट्टा ₹133 ते ₹140 असा निश्चित करण्यात आला होता. आयपीओला तब्बल 301.52 पट सबस्क्रिप्शन मिळाले.
- पात्र संस्थात्मक खरेदीदार (QIBs) – 215 पट
- नॉन-इन्स्टिट्यूशनल गुंतवणूकदार (NIIs) – 350 पट
- किरकोळ गुंतवणूकदार (Retail) – 330+ पट
कंपनीची पार्श्वभूमी
एअरफ्लो रेल टेक्नॉलॉजी लिमिटेडची स्थापना डिसेंबर 1998 मध्ये झाली. कंपनी भारतीय रेल्वेसाठी ट्रेन कोच आणि संबंधित उपकरणे तयार करते. याशिवाय एरोस्पेस आणि संरक्षण क्षेत्रासाठीही विविध घटक पुरवते.
मोठ्या प्रकल्पांवर सहभाग
या कंपनीने आतापर्यंत अनेक महत्त्वाच्या प्रकल्पांमध्ये सहभाग नोंदवला आहे.
- श्रीलंका DEMU ट्रेन्स
- मेनलाइन कोचेस
- आग्रा-कानपूर मेट्रो
- RRTS (रीजनल रॅपिड ट्रान्झिट सिस्टम)
- विस्टाडोम कोच
- वंदे भारत एक्सप्रेस
या प्रकल्पांमध्ये कंपनीने केवळ घटक निर्मितीच नाही तर प्रकल्प व्यवस्थापनाची जबाबदारीही सांभाळली आहे.
