Odisha Minister Naba Das Death: ओडिशाचे आरोग्य आणि कुटुंब कल्याण मंत्री(Odisha health and family welfare minister) आणि बिजू जनता दलाचे ज्येष्ठ नेते नबा दास(Naba Das) यांचा उपचारा दरम्यान मृत्यू झाला. पश्चिम ओडिशातील झारसुगुडा जिल्ह्यात काल(29 जानेवारी) ब्रजराजनगरमध्ये दिवसाढवळ्या एका सहाय्यक उपनिरीक्षकाने नबा दास यांच्यावर गोळीबार केला ज्यामध्ये ते गंभीर जखमी झाले. 60 वर्षीय दास हे एका कार्यक्रमात सहभागी होण्यासाठी कारमधून उतरत असताना सहाय्यक पोलीस उपनिरीक्षक गोपाल दासने त्याच्यावर पॉइंट ब्लँक रेंजमधून गोळीबार केला, ज्यामध्ये त्यांचा मृत्यू झाला.
नबा किशोर दास यांच्याबद्दल
एका मीडिया रिपोर्ट्सनुसार, नबा किशोर दास हे देशातील सर्वात श्रीमंत मंत्र्यांपैकी एक होते. मुख्यमंत्र्यांनंतर मंत्रिमंडळातील ते दुसरे सर्वात श्रीमंत मंत्री होते. नब किशोर दास यांनी 2004 मध्ये पहिल्यांदा ओडिशातील झारसागुडा मतदारसंघातून काँग्रेसच्या तिकिटावर निवडणूक लढवली होती, मात्र त्यावेळी त्यांचा पराभव झाला. त्यानंतर 2009 मध्ये त्यांनी पुन्हा निवडणूक लढवली आणि ती जिंकली सुद्धा. त्यानंतर 2014 आणि 2019 च्या निवडणुकाही त्यांनी जिंकल्या. सध्या ते बिजू जनता दलमध्ये सक्रिय होते. ओडिशातील नवीन पटनायक यांच्या सरकारमध्ये सध्या ते आरोग्यमंत्री होते. 2015 मध्ये ओडिशाच्या विधानसभेच्या अधिवेशनादरम्यान पॉर्न फिल्म पाहताना त्यांना पकडलं गेल्यामुळे ते चर्चेत आले होते. या प्रकरणामध्ये विधानसभा अध्यक्षांनी त्यांना आठवडाभरासाठी निलंबित केले होते. मात्र, नब किशोर दास यांचे म्हणणे होते की, इंटरनेट वापरताना चुकून पॉर्न फिल्म सुरु झाली. याअगोदर त्यांनी कधीही पॉर्न फिल्म पाहिली नाही.
मुख्यमंत्री नवीन पटनायक यांच्याकडून शोक
ओडिशाचे मुख्यमंत्री नवीन पटनायक यांनी नबकिशोर दास यांच्या मृत्यूवर शोक व्यक्त केला आहे. घडलेली घटना ही अतिशय धक्कादायक होती. डॉक्टरांनी शर्तीचे प्रयत्न केले, मात्र त्यांना वाचवलं जाऊ शकलं नाही, असं पटनायक म्हणाले. नबकिशोर हे सरकार आणि पक्ष या दोघांसाठी संपत्तीप्रमाणे होते. त्यांनी लोकांच्या उपयोगासाठी आरोग्य विभागात अनेक नवे उपक्रम सुरू केले आहेत. एक नेता म्हणून बीजू जनता दलाचा उभारी देण्यात त्यांचे महत्त्वाचे योगदान आहे असे ते म्हणाले.
‘या’ मंदिरात केला होता सोन्याचा कलश दान
महाराष्ट्रातील अहमदनगर जिल्ह्यातील शिंगणापूर येथील शनी मंदिर ट्रस्टला नबा किशोर दास यांनी एक कोटी रुपयांचा सोन्याचा आणि चांदीचा कलश दान केला होता. दान केलेला कलश हे शनी मंदिराला दिलेले आतापर्यंतचे सर्वात महागडे दान असल्याचे सांगितले जात आहे.
