महाराष्ट्र सरकारने शुक्रवारी विविध कंपन्यांसोबत ८०,९६२ कोटी रुपयांच्या ९ सामंजस्य करारांवर स्वाक्षरी केली, ज्यामुळे राज्यात ४०,३०० हून अधिक नवीन रोजगार निर्माण होतील. हे करार मुंबईतील 'स्टील महाकुंभा'मध्ये मुख्यमंत्री देवेंद्र फडणवीस आणि केंद्रीय मंत्री प्रल्हाद जोशी यांच्या उपस्थितीत झाले. या गुंतवणुकीचा मोठा भाग विदर्भ आणि मराठवाड्यात होत आहे.
यात वर्ध्यात रश्मी मेटलर्जिकलचा २५,००० कोटींचा प्रकल्प आणि रायगडमध्ये जिंदाल स्टेनलेसचा ४१,५८० कोटींचा प्रकल्प प्रमुख आहेत. गडचिरोली, चंद्रपूर, नागपूर आणि इतर जिल्ह्यांमध्येही छोटे-मोठे प्रकल्प येणार आहेत. ही गुंतवणूक राज्याच्या विविध भागांत, विशेषतः मागासलेल्या भागांमध्ये, औद्योगिक विकासाला चालना देईल. हा करार केवळ आकडेवारीपुरता मर्यादित नसून, राज्याच्या औद्योगिक विस्ताराचे आणि रोजगार निर्मितीचे एक मोठे पाऊल आहे.
मुंबईतील गोरेगाव येथे एआयएफएने आयोजित केलेल्या स्टील महाकुंभात मुख्यमंत्री देवेंद्र फडणवीस, केंद्रीय मंत्री प्रल्हाद जोशी आणि राज्याचे उद्योग मंत्री उदय सामंत यांच्या उपस्थितीत हे करार करण्यात आले.
इतर प्रकल्पांमध्ये आयकॉन स्टील इंडिया प्रायव्हेट लिमिटेडचा चंद्रपूरमधील ८५० कोटी रुपयांचा स्पंज आयर्न युनिट, फिल्ट्रम ऑटोकॉम्पचा वाई, सातारा येथील १०० कोटी रुपयांचा ऑटोमोटिव्ह स्टील पार्ट्स युनिट, जीआर कृष्णा फेरो अलॉयजचा मुलमधील १,४८२ कोटी रुपयांचा स्पंज आयर्न प्रकल्प आणि जयदीप स्टीलवर्क इंडियाचा नागपूरमधील १,३७५ कोटी रुपयांचा आयएसपी प्रकल्प यांचा समावेश होता.
