गुगलच्या जपान शाखेतील कर्मचार्‍यांनी एक युनियन स्थापन केली आहे. याचे कारण म्हणजे अमेरिकेतील मोठ्या टेक कंपन्यांमध्ये टाळेबंदी सुरूच आहे. जपानमध्ये अशा प्रकारची कामगार संघटना प्रथमच स्थापन झाली आहे. त्याला गुगल जपान युनियन असे नाव देण्यात आले आहे. अमेरिकन टेक कंपन्या, यूएस-आधारित कर्मचाऱ्यांना काढून टाकल्यानंतर आता त्यांच्या परदेशी शाखांमध्ये देखील अशीच पावले उचलत आहेत. जपानमध्येही मोठ्या प्रमाणात Layoff अपेक्षित आहे. हे पाहता गुगल जपान युनियनने या आठवड्यात कंपनी अधिकाऱ्यांना पत्र पाठवले आहे. त्यात त्यांनी म्हटले आहे की, अशा कोणत्याही हालचाली करण्यापूर्वी युनियनला 'सामूहिक चर्चेची संधी मिळाली पाहिजे. युनियनचा दावा आहे की, डझनभर Google कर्मचारी त्यात सामील झाले आहेत आणि डझनभर आणखी लवकरच त्याचा भाग असतील.
गूगलची 6 टक्के कर्मचारी कपात
गुगलची मालकी कंपनी अल्फाबेटने या वर्षी जानेवारीमध्ये आपल्या 12 हजार कर्मचाऱ्यांना कामावरून काढण्याची घोषणा केली होती. ही संख्या गुगलमध्ये काम करणाऱ्या एकूण कर्मचाऱ्यांच्या सहा टक्के आहे. गुगल जपान युनियनचे अध्यक्ष शिंजी ओकुयामा यांनी सांगितले की, त्यांच्या वतीने फेब्रुवारीमध्ये कंपनीला पत्र पाठवण्यात आले होते. त्यात कंपनीला कर्मचारी मार्चमध्ये माहिती देतील असे सांगण्यात आले. आता कंपनीला अधिकृतपणे युनियनच्या स्थापनेची माहिती देण्यात आलेली आहे.कर्मचाऱ्यांच्या म्हणण्यानुसार, जेव्हा गुगलने इतरत्र कामावरून कमी करण्यास सुरुवात केली तेव्हा जपानमधील कर्मचाऱ्यांमध्येही भीती पसरली. त्यामुळे युनियन स्थापन करण्याच्या प्रयत्नांना कंपन्यांचा पूर्ण पाठिंबा मिळाला आहे. दरम्यान या गुरुवारी जपानमधील अनेक Google कर्मचाऱ्यांना कंपनीकडून एक ई-मेल प्राप्त झाला. त्यात म्हटले आहे की, कर्मचाऱ्यांनी 14 दिवसांत राजीनामा देण्याचा निर्णय घेतल्यास त्यांना अतिरिक्त बोनस दिला जाईल. तसेच, कंपनी त्यांना दुसरी नोकरी मिळवून देण्यासाठी मदत करेल. त्यानंतर अनेक कर्मचाऱ्यांना व्यवस्थापकांशी थेट चर्चा करण्यासाठी बोलावण्यात आले आहे.
टोकियो मॅनेजर्स युनियनचे सरचिटणीस अकाई जिम्बू यांनी nikkaiasia.com या वेबसाइटला सांगितले की कंपनी आता जे काही करत आहे त्यात काहीही बेकायदेशीर नाही. मात्र कंपनी कर्मचाऱ्यांना नोकरी सोडण्यासाठी प्रोत्साहन देत आहे, असा त्याचा अर्थ समजेल. या युनियन अंतर्गत गुगल जपान युनियनचे आयोजन केले जाते.व्यवस्थापकांशी थेट चर्चेत सहभागी होणार नसल्याचे अनेक कर्मचाऱ्यांनी माध्यमांना सांगितले. आता सर्व बोलणी युनियनच्या माध्यमातूनच होतील. दरम्यान, जगभरातील कार्यालयांमध्ये काम करणाऱ्या कर्मचाऱ्यांनी आपापसात संवादाचे माध्यम प्रस्थापित केल्याचे वृत्त आहे. याद्वारे ते काढण्यात येणार्‍या कर्मचाऱ्यांची संख्या आणि त्यांच्याशी संबंधित इतर माहिती शेअर करत आहेत. अमेरिकेतील Google कर्मचार्‍यांनी 2021 मध्ये प्रथमच अल्फाबेट वर्कर्स युनियनच्या नावाने त्यांची युनियन स्थापन केली. कर्मचाऱ्यांच्या Layoff ला या संघटनेचा सातत्याने विरोध आहे.अमेरिकेतील हायर अँड फायर या धोरणांतर्गत कंपन्यांना त्यांच्या इच्छेनुसार कर्मचाऱ्यांना काढून टाकण्याचा अधिकार आहे. पण जपानमध्ये याबाबतचे नियम अधिक कडक आहेत. या नियमांचा लाभ मिळेल, अशी आशा येथील कर्मचाऱ्यांना आहे.
