जगातील काही भागांमध्ये कोविड संसर्गाची वाढती प्रकरणे आणि अमेरिकेतील मंदीच्या चिंतेमध्ये परदेशी पोर्टफोलिओ गुंतवणूकदारांनी (FPIs – Foreign Portfolio Investers) जानेवारीच्या पहिल्या आठवड्यात भारतीय शेअर बाजारातून 15,000 कोटी रुपये काढले. यापूर्वी, एफपीआयने डिसेंबरमध्ये स्टॉक मार्केटमध्ये 11,119 कोटी रुपयांची गुंतवणूक केली होती. नोव्हेंबरमध्ये त्यांनी 36,239 कोटी रुपयांची निव्वळ गुंतवणूक केली होती. FPIs (Foreigh Portfolio Investers) गेल्या काही आठवड्यांपासून भारतीय शेअर बाजारांबाबत सावध दृष्टिकोन अवलंबत आहेत.
जानेवारीमध्ये भारतीय शेअर बाजारातून 15,068 कोटी रुपये काढले
कोटक सिक्युरिटीज लि.चे इक्विटी रिसर्च (रिटेल) प्रमुख श्रीकांत चौहान म्हणाले की, पुढे जाऊन एफपीआय प्रवाह अस्थिर राहील. मात्र, देशांतर्गत आणि जागतिक चलनवाढ आता खाली येत आहे. डिपॉझिटरी डेटानुसार, एफपीआयने 2 ते 13 जानेवारी दरम्यान भारतीय शेअर बाजारातून 15,068 कोटी रुपये काढले. जानेवारीतील 10 ट्रेडिंग सत्रांमध्ये केवळ दोन दिवस एफपीआय निव्वळ खरेदीदार ठरले आहेत.
एफपीआय प्रवाहाच्या दृष्टीने 2022 हे वर्ष सर्वात वाईट
एकूणच, एफपीआयने 2022 मध्ये भारतीय शेअर बाजारातून 1.21 लाख कोटी रुपये काढले होते. जागतिक स्तरावर मध्यवर्ती बँकांकडून व्याजदरात झालेली आक्रमक वाढ, विशेषत: फेडरल रिझर्व्हची आक्रमक भूमिका, कच्च्या तेलाच्या किमतीतील अस्थिरता आणि रशिया-युक्रेन युद्धामुळे वस्तूंच्या किमतीत झालेली वाढ हे याचे प्रमुख कारण आहे. एफपीआय प्रवाहाच्या बाबतीत मागील वर्ष सर्वात वाईट होते. गेल्या तीन वर्षांत FPIs हे भारतीय शेअर बाजारात निव्वळ गुंतवणूकदार होते.
भारताची स्थिती तुलनेने मजबूत आहे
हिमांशू श्रीवास्तव, असोसिएट डायरेक्टर-मॅनेजर रिसर्च, मॉर्निंगस्टार इंडिया म्हणाले, “जगाच्या वेगवेगळ्या ठिकाणी अजूनही कोविडचा धोका आहे. याशिवाय अमेरिकेतील मंदीच्या चिंतेमुळे एफपीआयना भारतासारख्या उदयोन्मुख देशांत गुंतवणूक करण्यापासून रोखले जात आहे.जानेवारीमध्ये स्टॉक व्यतिरिक्त एफपीआयने कर्ज किंवा बाँड मार्केटमधून 957 कोटी रुपये काढले आहेत.भारताव्यतिरिक्त इंडोनेशियामध्ये एफपीआय प्रवाह नकारात्मक आहे. मात्र ते फिलीपिन्स, दक्षिण कोरिया आणि थायलंड मार्केटमध्ये निव्वळ खरेदीदार आहेत.
